A maior parte dos residuos que producimos son reciclables, é dicir, poden ter unha segunda vida. Para que isto sexa posible, deben ser separados por materiais (papel, metal, plásticos e demais) e depositados nos colectores apropiados ou ben no punto limpo.
Aquí tes unha pequena guía para saber onde ten que ir cada cousa.
Residuos reciclables
Sen separación non hai reciclaxe!
Envases lixeiros
Son fundamentalmente:
- Envases de plástico: botellas, botes, plástico film, porexpam…
- Envases de metal: latas férricas ou de latón e envases de aluminio (latas de bebida, bandexas de aluminio...). Inclúense tamén os aerosois e o papel de aluminio.
- Envases mixtos: principalmente bricks, pero tamén envases de cartón que conteñen capas de plástico e/ou aluminio.
- Caixas de madeira de froita e verdura.
- Envases de cerámica.
Só se son depositados nos colectores amarelos serán destinados á reciclaxe. Pódense recoñecer porque levan o punto verde.
Vidro
O vidro é un material 100% reciclable infinitas veces para facer novos envases de idénticas características sen perder propiedades. Ademais é inerte, quere dicir que non interactúa nin física nin quimicamente co medio.
Pódense depositar nos iglús verdes: tarros, frascos e botellas. Cousas que non poden ir no iglú: xanelas, espellos, vasos e copas, pratos e vaixelas, lámpadas, cerámica, tapas e tapóns e envases con medicamentos.
Pódense recoñecer porque levan o punto verde.
Papel e cartón
Neste colector deben depositarse exclusivamente:
- envases de alimentación
- caixas de calzado
- envases de cartón de produtos conxelados
- papel de envolver
- papel de uso diario (folios, sobres...)
Non se deben depositar bricks, papel de cociña usado (pode ir coa materia orgánica), nin cueiros e compresas (deberán ir ao colector de resto).
É moi importante depositar as caixas encartadas para que non saturen os colectores.
Pódense recoñecer porque levan o punto verde.
Voluminosos
Se te queres desfacer de mobles ou colchóns, existen varias opcións.
- Para aquelas cousas en bo estado, existen varias plataformas web e aplicacións que facilitan o seu intercambio ou venda dos mesmos. Deste xeito, alguén pode darlle unha segunda vida ó que a ti xa non che vale.
- No caso de estar deteriorados, pódense levar ao punto limpo no horario, luns, martes, xoves, venres e sábados de 09:00 a 13:00 - 16:00 a 19:00, mércores PECHADO, levando o recibo do pago da taxa de lixo.
- Para a recollida domiciliaria, debes chamar ao teléfono 900 725 425 e acordar día, hora e lugar para a recollida.
Restos vexetais
Hai varias alternativas para xestionar os restos de xardíns e hortas. Por favor, nunca os deposites no colector verde.
- Os restos de herba, pódense amorear nun curruncho no que non molesten e deixar que se composten naturalmente.
- Solicitude de biotrituradoras
A Mancomunidade adquiriu biotrituradoras eléctricas que están dispoñibles para préstamo gratuíto nos concellos de Bueu, Cangas e Moaña e pódense utilizar para triturar podas miúdas de froiteiras.
Para solicitalas, só tes que presentar unha instanscia no rexistro ou sede electrónica do teu concello adxuntando o recibo do lixo. O préstamo será por un máximo de 5 días.
Enlaces ás sedes electrónicas.
- Punto limpo
Pódense levar os restos de herba e podas ao punto limpo. É gratuíto para a cidadanía presentando o recibo do lixo.
Aceite de cociña
O aceite sobrante de cociñar ou das latas de conserva, nunca se debe botar polo vertedoiro xa que obstrúe as tubaxes e favorece a aparición de malos cheiros. O aceite usado é un dos principais contaminantes dos mares e ríos, xa que impide o intercambio de osíxeno o que asfixia os seres vivos.
1 litro de aceite pode contaminar máis de 1.000 litros de auga.
Se te queres desfacer do aceite de cociña, existen varias opcións.
- Pódese empregar para fabricar xabón caseiro.
- Unha vez frío, podes depositalo nunha botella ou envase reciclable (NUNCA de vidro) e, unha vez pechada, botalo no colector de aceite. Este será empregado para fabricar biocombustible.
Podes solicitar, de xeito gratuíto, o teu funil: info@mancomunidadedomorrazo.gal
Téxtiles
Os residuos téxtiles compóñense fundamentalmente de roupa de vestir, calzado e téxtil dos fogares.
O sector téxtil é un dos sectores económicos con maior impacto ambiental, pois é o segundo que máis consume auga e o responsable do 8-10% das emisións de CO2 no mundo (UN Environment Programme, 2019).
Máis dun millón de toneladas de residuos téxtiles son xerados cada ano no estado -uns 20-30 quilos por persoa-, dos que apenas se recollen 110.000 toneladas, o que tan só representa un 10 %, polo que o resto deposítase noutras fraccións ata acabar finalmente nun vertedeiro.
Opcións para os residuos téxtiles:
- Doalos a asociacións.
- Vendelos en tendas de segunda man ou plataformas.
- Transformalos para un novo uso.
- Depositalos nos colectores específicos.
CONTACTO
Correo de atención á persoa usuaria
info@mancomunidadedomorrazo.gal