Recollida Porta a Porta

Un dos principais xeradores de biorresiduos son os establecementos de restauración e hostalaría: bares e restaurantes, cafetarías, hoteis, comedores de empresas, centros educativos, etc. A maioría destes restos orgánicos prodúcense durante a manipulación dos alimentos e a preparación de comidas ou durante o seu consumo (excedentes ou ben, restos non consumibles como tonas, ósos, cunchas…).

O obxectivo principal desta recollida selectiva é mellorar a xestión dos residuos da Mancomunidade e incrementar as taxas de reciclaxe para aproximarse aos obxectivos das diferentes normas: europea, estatal e autonómica. Ao mesmo tempo, transformaranse estes residuos nun fertilizante natural, o compost, que poida substituír a outros tipo de fertilizantes e manter a calidade dos solos nos que se aplica.

Para evitar danos no medio ambiente e acadar os obxectivos europeos, a recollida separada dos residuos orgánicos é imprescindible. É importante que a materia orgánica estea “limpa”, é dicir, que non presente impropios, tales como plásticos, vidro, metais, etc, para que poida ser compostada correctamente. No caso de non estar ben separada destes elementos impropios sería inservible.